Poem: Kyun Hai Ye Anban..by Late Raj Hindustani

by Late Raj Hindustani

Bachpan se yahi sunta tha ki Pakistan hamara dushman hai,
Puchu kis se, kaun bataye dono mein kya anban hai…

Anban kya hai, jhagda kya hai puchu mein sabse jaakar,
Sab bole nadaan hai tu samjhega na tu khulkar…

Mein bolu nadaan ho tum sab kuch bhi pata na hai tumko,
Pata nahi hai kuch bhi phir kyu bhadkaaye hum sabko…

Thak haar kar ghar mein pahocha pucha Maa se jaakar,
Kyun ladte hai yeh dono tumhi batado Maa khulkar…

Maa boli kuch yu haskar ke beta tu kyu darta hai,
Dosti karne ko hum to kya, Pakistan bhi marta hai…

Rajniti ke is khel ne in dono ko hai yu toda,
Judey hue the dil hum sabke, isne hai rishto ko toda…

Kya matlab tha Maa ka main to kuch bhi samajh na paya,
Soch sochkar raat beet gayi, mein to so na paya…

Ab bada hua to sochta hu kyu na naya jahaan banaye,
Biti bisri bhulkar kyu na aman hi aman failaye…

Jo bade na kar sake kyu na hum hi woh kar jaaye,
Aage badhkar kyu na hum dosti ka haath badhaye…

Sabko bas mein yahi kahunga pyar ke diye jalao,
In diya ke sab andhiyaro ko roshan kar jao…

Likho aisa paigaam ki duniya khush ho jaye,
Pyar ki duniya mein apna naam amar ho jaye…

Jai Hind…❤❤Jeevey Pakistan

This poem was penned down by Raj Hindustani, a 19 year old peace activist from India whom we lost on 9th April 2017.  It was shared to us by Ashish Kr Mishra. Aaghaz-e-Dosti pays respect to him and his commitment to Indo-Pak peace. 

Advertisement

Poem: Koi Jang Meri Na Khushiyan Ujaade by Ravi Nitesh (India)

Kahani nahi hai ye teri meri

Ye hai ek daastan dard bhari si,

Sarhad pe rehne walon se puchho, 

Unke liye kya hain jeene ke maayne,

Vo kehte hain es saal fasal khoon ugi hai , 

Vo kehte hain baarish bhi badhiya hai aayi,

Dua bas hai honi itni kubool ab,

Mere khet me koi tank bomb na aaye,

Bagal ke jile me hai phulon ki kheti,

khushboo uski udkar mere khet aaye,

Dua bas hai honi, itni kubool ab,

Koi phool abki raunda na jaaye,

Na aaye yahan baarudon ki khushboo,

Sunayi na de mujhko cheekhein pukarein, 

Maalik mere bas itna hi de,

Koi jang meri na khushiya ujaade…. 

*Painting by a Pakistani student, Mohammad Hamza. This painting is copyright of Aaghaz-e-Dosti.

Poem: Jung Kyun Na Ho, Zaroor Honi Chahiye

by Ravi Nitesh (India)

Photo Source: Internet

Jung kyun na ho, Zaroor honi chahiye;
ba-sharte, jung ho behtaree ki.

Pehli jung ho tumhari khud tum se,
Jung ho tumhari ‘mai’ aur ‘hum’ se,
Tumhari jung ho tumhare har ek pal se,
aur tum jeetna chaho, har pal jeene ko, Zindgi banane ki jung.

Jung ho tumhari khud tumhare usoolon se,
aur tum banate raho bhalai aur tarakee ke usool,
Jung ho tumhari nafrat se, 
Aur tum nikaal phenko saara zeher khud se.
Jung es baat ke liye ho,
ki na lag jaaye jung tumhare khud ke wajood ko.

Aur vo jung, jiski waqalat tum kiya karte ho,
kabhi majhab ke thekedaar aur kabi siyasatdaar bankar,
darasal vo nishani hai ki lag chuka hai jung tum par,
Jung kyun na ho, zaroor honi chahiye, 
Jung utaarne ki jung, 
behtaree aur bhalai ki jung,
khud tum se tumharee jung.