Poem: Suno Aee Mere Humsaye

by Osama Siddiq (Pakistan)

 

Hamain Tum Say Muhabbat Hay 

Suno Aee Mere Humsaye 

Hamain Tum Say Muhabbat Hay 

Khuda Nay Tau Zameen Banai Thi 

Daantoon Talay Zabaanay Hum Nay Bheechi Hain 

Sub Lakeeray Yahaan Wahaan Hum Nay Kheechi Hain 

Daikho Suraj Aik Hay Apna 

Chaand Ki Chandni Dono Ko Mayaseer Hay 

Hawa Sub Kay Liye Hi Tau Zindagi Ki Alamaat Hay 

Agar Tumhain Ghum Hay Thora Sa Tau 

Yahaan Bhi Malamaat Hay 

Chalo Phir Aik Ho Jain 

Agar Sukha Paray Wahan Tau Barish Hum Say Lai Laina 

Yahaan Jo Baar Ajai Tau Tum Paani Chura Laina 

Hamaray Suroon Ko Tum Apna Saaz Dai Daina 

Koi Mushkil Jo  Aajai Tau Bus Awaaz Dai Daina 

Hamareay Sath Chalnay Walay Dosti Kay Saee 

Hamain Tum Say Muhabbat Hay 

Suno Aee Mere Humsaye 

Hamain Tum Say Muhabbat Hay!

*Painting by Anubha Rawat, an Indian student studying in Goodley Public School (Delhi)

---

Osama Siddiq is based in Pakistan. He works as a scriptwriter at Geo Entertainment

Advertisement

Poem: Aik Khawb…by Usman Zia (Pakistan)

Goliyon ka shor tha dono taraf,

Raat, ghehri raat thi

Kuch jawan logon ke marne ki

Khabar bhi aai thi, Kya hua tha?

Kuch purane balghami zehno’n ka

Khumyaza bhuagtne wale logon ke

Gharon ki aorten thi,

Baal kholy ro rahi thi,

Dono janib surkh topi wale fauji,

Apne apne marne walon ko

Shahadat ki salami de rahe the,

Dono janib mao’n ke seenon men

Jalti aag ki lipto’n ko kis ne dekhna tha?

 

Do samay ki rotian ghar bhejne ke waaste,

sarhadon per jaa’n hatheli par dhare kamsin sipahi,

Balghami zehnon kay khaabo’n ke jahannum men bhala kab tak jalen ge?

Kab bhala is khoon ki naddi ko roka jaey ga,

Kab talak hum raat ki chaadar mein

Lipte aik dooje keliay nafrat ki boli bolte,

Dil ke darwazon pe taale dale rakhenge?

Khatam kab hoga ye nafrat ka safar?

Kb bhala main jasakun ga apni Delhi ik pyari dost ke ghar,

Chaey par ……

*Painting by an Indian Student, Sayani Hazra (Gujarat Public School, Vadodara, India). Copyright of the painting belongs to Aaghaz-e-Dosti

---

Usman Zia is a young poet based in Lahore. He is working as a lecturer of Special Education in University of Management and Technology, Lahore. He also served as joint secretary of Halqa-e-Arbab-e-Zaoq, Lahore which is one of the oldest literary organisations in the sub-continent.